Yafahamu mambo yafuatayo kuhusu Afya ya Kinywa na Meno

Imechapishwa: March 30th, 2021

Na Nyeneu, P. R

Katika miaka mitano iliyopita tafiti mbalimbali za Magonjwa ya Kinywa na Meno Mkoa wa Manyara zimeonyesha kuongezeka kwa asilimia Hamsini na Moja (51%) Walieleza madaktari Catherine Mganga kutoka kitengo cha Meno Hospitali ya wilaya ya Babati na Daktari Mahendeka Mratibu wa afya ya kinywa na Meno kutoka ofisi ya Katibu Tawala Mkoa wa Manyara. Katika tafiti hizo, takwimu pia zinaonesha magonjwa yanayoongoza ni kutoboka kwa meno, Magonjwa ya Ufizi, na mengine ni mpangilio mbaya wa Meno, kuzidi kwa Madini ya floraidi (Floride) kwenye meno ambayo husababisha au hubadili rangi ya meno pia ni pamoja na ajali zinazohusisha maeneo ya kinywa na meno.

Meno yaliyoharibika kwa kubadilika rangi baada ya kuzidi madini ya Floride

Kwa kawaida matibabu ya magonjwa hayo hupatikana katika vituo vya kutolea huduma za kinywa na meno ambazo ni Hospitali zote za Halmashauri za Mkoa wa Manyara, Vituo vya Afya vya Magugu na Katesh na Kliniki za Kinywa na Meno za Eagle Polyclinic na Oasis Dental Clinic. Alisema Dkt. Mahendeka. Matibabu hayo ni pamoja na Kung'oa jino, Kuziba jino, kusafisha na kutoa ushauri wa Kinywa na Meno wa Jamii nzima.

Ung'oaji wa Jino kwa Mama Mjamzito ni salama kabisa na ni Muhimu iwapo Mjamzito anasumbuliwa na Jino (Meno)

Aidha Wataalamu hao waliongeza kuwa kumekuwa na nadharia potofu hususani matibabu ya meno hasa hasa kung'oa. Imani hizo zinatokana na mazoea mbalimbali katika jamii. Kitaalamu meno yoyote yanaweza kung'olewa wakati wowote. Baadhi ya Imani hizo potofu ni: -

1. Mama Mjamzito hawezi kung'olewa jino
2. Mtu hawezi kung'olewa jino akiwa amekula
3. Jino la juu haling'olewi
4. Kung'oa meno ni Asubuhi tu.
5. Huwezi kung'olewa jino ukiwa umevimba
6. Ganzi haishiki kwa Mnywaji wa Pombe.
7. Dawa ya Jino ni Kung'oa
8. Meno ya Plastiki
9. Hairuhusiwi kung'oa jino zaidi ya mara moja kwa wakati mmoja.

na zingine nyingi.