Taratibu za utoaji wa Leseni za Biashara

MFUKO WA MAENDELEO YA JAMII- TASAF

• Utangulizi 

Halmashauri ya Mji wa Babati ni miongoni mwa Halmashauri/Manispaa na Miji 27 zilizoko katika awamu ya tatu ya utekelezaji.

Utekelezaji wa mpango wa TASAF awamu ya tatu ndani ya Halmashauri ya Mji wa Babati ulianza rasmi tarehe 15 Julai, 2014 kwa kuzitambua na kuandikisha kaya maskini katika vijiji 6 na Mitaa 15 kati ya vijiji 13 na Mitaa 35 iliyopo katika Halmashauri. Kwa sasa mpango umefika kwenye vijiji vyote 13 na mitaa 35 ya Halmashauri ya Mji wa Babati. Mpango huu umewafikia walengwa 2319.

• Madhumuni ya Mpango
• Madhumuni ya Mpango huu ni kuziwezesha kaya maskini kupata mahitaji ya msingi na fursa za kujiongezea kipato na kuweka akiba. Walengwa wa mpango huu ni kaya maskini katika jamii kwa maeneo ya utekelezaji yaliyoainishwa.
• Walengwa wa Mpango

Walengwa wa Mpango wanatoka Mitaa 35 na Vijiji 13 vifuatavyo:-  Babati Mjini, Hangoni, Kwere, Maisaka B, Majengo, Mrara, Waang'waray, Bagara ziwani, Komoto, Miomboni, Mjimpya, Nakwa, Negamsi, Ngarenaro, Nyanguu, Oysterbay, Ayabadinay, Bonga mjini, Dawar, Haraa, Himiti, Kandaka, Waang’boo, Kiongozi, Maisaka A, Maisaka kati, Malangi, Mruki, Sawe, Chemchem, Mutuka, Arri, Balowa, Halla, Maweni, Mkuyuni A, Mkuyuni B, Nangara Kati, Ziwani, Daghailoy, Imbilili, Sigino, Singu, Gendi Barazani, Gendi Kuu , Majengo Mapya, Managhat na Nyawari.

• Uhawilishaji wa fedha.

Katika uhawilishaji wa fedha, Halmashauri ya Mji wa Babati inahawilisha fedha kwa njia 2 ambazo ni kwa njia ya Fedha taslim na njia ya kielektroniki ambapo jumla ya walengwa 818 wanapokea fedha zao kwa njia fedha taslim na 1,501 kwa njia ya kielektroniki.

Kwa mwaka wa fedha 2022/2023 na 2023/2024, Halmashauri ya Mji wa Babati ilipokea kiasi cha Tsh. 686,373,242/= kwa ajili ya zoezi la uhawilishaji fedha kwa walengwa.

• Utekelezaji wa miradi ya kutoa ajira za muda

Miradi hii inatekelezwa na kaya zilizoandikishwa kwenye mpango zenye watu  wenye uwezo wa kufanya kazi kwa kutumia teknolojia ya nguvu kazi.

Miradi hii inatekelezwa kwa kufuata kanuni na taratibu za utekelezaji wa miradi ya ajira za muda kwa washiriki kama zilivyoainishwa kwenye miongozo ya utekelezaji.

Madhumuni ya miradi ya kutoa ajira za muda ni kutoa fursa zifuatazo:

• Kutoa ajira ya muda kwa walengwa ili kuongeza kipato na matumizi kwenye Kaya,
•  Kupata  miundombinu katika  jamii, na
• Kuongeza ujuzi kwa walengwa.

Halmashauri ya Mji wa Babati ilianza kutekeleza Miradi ya kutoa ajira za muda kwa mwaka 2022/2023 ambapo jumla ya miradi 31 iliibuliwa na kutekelezwa miradi 29. Katika utekelezaji wa miradi hii, jumla ya Tsh. 258,372,000 zilizipwa kama ujira kwa kaya 1,647 zilizoshiriki katika kazi za kutoa ajira za muda. Kwa mwaka 2023/2024, jumla ya miradi 33 iliibuliwa ambapo kati ya hiyo kuna miradi 7 ambayo imeanza kutekelezwa.

• Uanzishwaji wa vikundi vya kuweka akiba na kukopeshana.

Mpango wa Kuhamasisha Jamii Kuweka Akiba na Kuwekeza  ni mojawapo ya mbinu za kujenga uwezo iliyobuniwa ili kujenga tabia na utamaduni wa kuweka akiba na kuwekeza kwa Walengwa wa Mpango wa Kunusuru Kaya Maskini Mijini na Vijijini.

Mpango huu utabadilisha mbinu za zamani za kuweka akiba na kuwekeza kuwa mbinu za kisasa amabapo akiba hiyo inaweza baadae kuwekezwa kupitia taasisi za fedha ili kukuza kipato cha kaya na kuondokana na umaskini.

Mkazo unawekwa katika kuhamasisha uwekaji wa akiba na kujenga uwezo kupitia mafunzo mbalimbali yatakayotolewa kwa Vikundi vya walengwa vitakavyoundwa.

Halmashauri ya Mji wa Babati katika kutekeleza program hii, imeanzisha vikundi vya walengwa 43 vyenye jumla ya walengwa 555. Vikundi hivi vimejengewa uwezo kwa kupewa mafunzo na kuwezesha vitabu vya kuweka kumbukumbu za kifedha. Aidha TASAF itagharimia utengenezaji wa kasiki kwa ajili ya kutunzia fedha ambapo baadaye itawawezesha kufungua akaunti katika taasisi za kifedha.

• Mafanikio

Pamoja na changamoto mbalimbali zinazojitokeza, yapo mafanikio makubwa miongoni mwa walengwa na jamii kwa ujumla kama ifuatavyo;

• Ongezeko la wanafunzi na watoto wa chini ya miaka 5 wanaohudumiwa na TASAF ambapo wanafunzi wameongezeka kutoka 951 hadi 2,660 wanapokea ruzuku ya masharti na watoto kutoka 171 hadi 450 wanapokea ruzuku ya masharti.
• Ongezeko la kaya zinazojiunga na Mfuko wa Afya ulioboreshwa kutoka 130 hadi 357.
• Asilimia 87 ya walengwa kuweza kumudu gharama mbalimbali za maisha
• Kuwekeza katika shughuli za kiuchumi, kama vile kilimo, mifugo midogomidogo na biashara ndogondogo.
• Kuboresha makazi kwa kujenga nyumba bora.
• Kuongezeka kwa ujuzi kupitia ajira za muda ambapo jumla ya kaya 1,647 zimenufaika.