Mhe. Sendiga amehitimisha Juma la Elimu ya Watu wazima katika Viwanja vya Stendi ya zamani Babati Mjini

Imechapishwa: September 4th, 2025

Mkuu wa Mkoa wa Manyara Mhe.Queen Sendiga amewataka wananchi kutumia fursa ya Elimu ya Watu wazima ili kuepukana na utegemezi kwenye jamii.

Hayo ameyasema wakati wa kilele cha maadhimisho ya Juma la Elimu ya Watu wazima yaliyofanyika kwa ngazi ya Mkoa katika stendi ya zamani Mjini Babati.

Aidha ameeleza kuwa Elimu ya Watu wazima inaendana na ujasiriamali na kuitaka jamii kuwaunga mkono wajasiriamali kwa kununua bidhaa zao ili kukuza uchumi wa Mkoa wa Manyara.

Pia amewataka Wakuu wa Wilaya na Wakurugenzi kuandaa mikakati inayotekelezeka ikiwa ni pamoja na kuandaa bajeti ili kufanikisha utekelezaji wa utoaji wa Elimu kwa Watu wazima.

Aidha Afisa Elimu Mkoa Halfan Omary ameeleza kuwa Elimu ya Watu wazima ilianzishwa mnamo mwaka1975 kwa Sheria ya Bunge namba 2.

"Takwimu ya sensa 2022 kwa Mkoa wa Manyara inakadiriwa kuwa asilimia 21.8 ya watu wazima wasiojua kusoma na kuandika" Ameeleza.

Pia ameongeza kuwa Serikali ina mipango mbalimbali ya Elimu ya Watu wazima ikiwemo MEMKWA ,Mpango wa Elimu changamani vijana walio nje ya mfumo Rasmi( IPOSA),Mitihani Binafsi inayotolewa na NECTA.

Maadhimisho ya Juma la Elimu ya Watu wazima yalianza Septemba 2/2025 na kutamatika Septemba 4/2025.