Wajasiriamali wadogo wadogo kunufaika

Imechapishwa: June 11th, 2020

Mheshimiwa mkuu wa Wilaya ya Babati Bi. Elizabeth Kitundu akiambatana na Mkurugenzi wa Halmashauri ya Mji Babati Ndg. Fortunatus Fwema, leo tarehe 11 Mei 2020 amezindua zoezi la ugawaji wa vitambulisho kwa wajasiriamali wadogo wadogo na wamachinga. Zoezi hilo liliambatana na ugawaji wa vitambulisho kwa baadhi ya wajasiriamali wadogo wadogo ikiwa ni ishara kwamba zoezi limezinduliwa rasmi. Akiongea na wananchi wa Mji wa Babati katika eneo la Machinga complex lililopo karibu na Soko kuu la Mji wa Babati, mheshimiwa mkuu wa wilaya amewaeleza wananchi juu ya umuhimu wa vitambulisho hivyo kwa wajasiriamali wadogo na wamachinga. 

Ugawaji wa Vitambulisho kwa baadhi ya wajasiriamali wadogo wadogo Mjini Babati

Nae afisa Biashara halmashauri ya mji Babati Bw. Chediel Fue ametoa ufafanuzi wa kina juu ya vitambulisho hivyo kwaajili ya wajasiriamali wadogo. Amewatoa hofu wajasiriamali wadogo wadogo na wamachinga wote kuwa wajisikie huru kufanya biashara katika mitaa yao. Ufafanuzi huo uliambatana na kutaja sifa za mjasiriamali au mmachinga anayefaa kupewa hicho kitambulisho. Mjasiriamali mwenye sifa ya kupewa kitambulisho cha ujasiriamali ni yule mwenye mauzo yasiyozidi shilingi elfu kumi na moja (11,000) kwa siku ama shilingi milioni Nne (4,000,000) kwa mwaka, yule ambaye yupo kwenye biashara ambayo sio rasmi au eneo lisilo rasmi mfano wamachinga. Pia mafundi pikipiki, wapiga debe, vinyozi ambao saluni zao gharama ya kunyoa na huduma zingine hazizidi shilingi elfu tano. Halmashauri ya mji wa Babati imepokea jumla ya vitambulisho elfu saba ambavyo tayari vimeanza kugawiwa kwa watendaji wa vijiji na hatimaye viwafikie wananchi walengwa. 

Baada ya ufafanuzi mzuri kutoka kwa Afisa Biashara, mheshiwa mkuu wa Wilaya akaeleza juu ya muitikio wa wajasiriamali wadogo wadogo katika kumuunga mkono mheshimiwa Rais Dr. John Pombe Magufuli kwa kuchangia shilingi za Kitanzania elfu ishirini (20,000) kununua vitambulisho hivyo vya awamu ya kwanza ambavyo hivi sasa vimeisha muda wake. 

Nawapongeza sana kwa kitendo cha kizalendo kumuunga mkono mheshimiwa Rais kwa kuweza kuchangia sh. 20,000 kwa ajili ya vitambulisho ambazo kwa kweli nina imani kubwa zimefanya maendeleo katika taifa letu la Tanzania.

Pia mheshimiwa mkuu wa Wilaya aliendelea kuwapongeza wajasiriamali wadogo wadogo na wamachinga wote wa mji wa Babati kwa shughuli zao za kijasiriamali wanazozifanya kila siku bila bugdha yoyote kwani wameweza kuufanya mji wa Babati kuchangamka na kupendeza machoni mwa kila mtu. 

Nawapongeza sana wamachinga na wajasiriamali wadogo wadogo wote kwa umoja wenu na shughuli zenu za ujasiriamali kwani mmefanya mji wetu wa Babati kuchangamka na kurahisisha upatikanaji wa Bidhaa na mahitaji mbalimbali kwa wananchi, hivyo mimi rai yangu kwenu sasa na mwaka huu tuchangie hiyo elfu ishirini (20,000) kama jinsi serikali yetu ilivyotuomba  na kutuagiza tununue na tusisumbuliwe katika kutoa au kulipa kodi nyingine yoyote, hiyo elfu ishirini inatosha. amesema mheshimiwa mkuu wa Wilaya.

Kwa picha zaidi bonyeza kituo cha habari kwenye menyu.

Imeandikwa na Nyeneu, P. R