Waziri Lukuvi Azindua Ofisi za Ardhi Mkoa wa Manyara: Agawa hati

Imechapishwa: June 24th, 2020

Waziri wa ya Ardhi, Nyumba na Maendeleo ya Makazi, Mhe. WILLIAM VANGIMEMBE LUKUVI akiwa mjini Babati amezindua ofisi za Ardhi mkoa wa Manyara jana tarehe 23 Juni 2020 ikiwa katika kuhitimisha utekelezaji maagizo ya Mheshimiwa Rais ya kupunguza na kuondoa kabisa migogoro ya Ardhi katika maeneo mbalimbali ya Tanzania. 

Leo nimekuja kuhitimisha maagizo ya mhe. Rais, Aliponiteua aliniambia kazi kubwa ya kuifanya ni kuondoa migogoro. Alisema Waziri

Akiongea na viongozi, watumishi na wananchi mbalimbali waliohudhuria uzinduzi huo, amesema migogoro ya Ardhi katika nchi yetu ilikuwa imetamalaki sana kipindi cha nyuma. Ameongeza na kusema kuwa katika kutekelezaji huo Wizara ya Ardhi imejitahidi sana kupunguza migogoro ya kiutawala mijini kwa namna ya kuonana na wananchi, wizara imeweza kutatua migogoro zaidi ya elfu kumi na mia tano (10,500). Pia aliongeza kuwa, kwa kutumia mabaraza ya Ardhi na nyumba Wizara imeweza kutatua migogoro zaidi ya laki tatu, ambayo yote haya yamefanyika katika kipindi hiki cha miaka mitano ya serikali ya awamu ya tano.

Katika kufanikisha yote hayo, Wizara ya Ardhi kupitia maagizo ya Rais, imeweza kuondoa mfumo wa urasimu katika kumiliki Ardhi. mfumo huu wa kiurasimu ulikuwa haumuwezeshi mwananchi wa kawaida kuweza kumiliki Ardhi kutokana na gharama kubwa zilizojificha na ambazo sio za kisheria.

Gharama za umilikishaji kisheria ni ndogo sana ukilinganisha na gharama ambazo zilikuwa hazisemwi wananchi ambao walikuwa wanazigharamia kwenda kupata haki yake ili akamirishe umiliki. Aliongeza mhe. Waziri.

Mhe. Waziri amelaani kitendo cha baadhi ya watumishi maofisini kuwanyanyasa wananchi ambao tayari wameshapimiwa maeneo yao na wameshalipa gharama zote kwenye Halmashauri husika za umilikishaji, na hati zao zikiwa tayari zimeshatiwa sahihi kuambiwa kuwa walipe nauli na gharama zingine za maisha ili hati zao zifuatwe moshi ambapo zamani ilikuwa ndo mahali hati zilikuwa zinatolewa kwa kanda ya kaskazini, amesema huo ni utumwa na umekomeshwa mara moja.

Sasa wale wananchi waliopimiwa na wameshalipa gharama zote kwenye halmashauri za umilikishaji, na hati wameshatia sahihi wanaambiwa wao wenyewe tena walipe nauli na gharama zingine za maisha wafaute hati moshi, huo ni utumwa. Alizidi kusisitiza mhe. Waziri

Aidha, katika uzinduzi wa ofisi hizi za mkoa, mhe. Waziri amegawa hati kwa watu, watu ambao hati zao zilikuwa tayari zimetayarishwa kutoka Babati na kusainiwa na kusajiliwa na kamishani hapa hapa Babati, hii ikiwa ni kuashiria kuwa ofisi hizi zimezinduliwa na tayari zimeanza kazi.

Sambamba na hilo, mhe. mkuu wa Mkoa wa Manyara Ndg. Alexander Mnyeti aliipongeza Idara ya Ardhi kuwa wako vizuri na wameanza vizuri na kazi yao ni nzuri. Mhe. mkuu wa Mkoa alimueleza Waziri kuwa hapo zamani Mkoa wa Manyara ulikuwa umekumbwa na migogoro na kesi za Ardhi. Lakini tangu uteuzi wa viongozi mbalimbali kwenye hizi ofisi mpya za Ardhi mkoa, mambo yamekuwa ni mazuri kwani hakuna malalamiko yoyote. Mhe. mkuu wa Mkoa aliendelea kwa kuelezea kero mbalimbali za Ardhi zilizopo katika mkoa wa Manyara na kusema kuwa kesi hizi zimekuwa ni changamoto sana kiasi kwamba kupelekea kuathiri shughuli zingine za kijamii.

Kwahiyo ukiamka ni Ardhi, ukilala ni Ardhi na kwa bahati mbaya sana kila kitu kinafanyika kwenye Ardhi basi kila kitu kimekuwa ni Ardhi. Na watu wetu huku wanapenda Ardhi na wanapenda pia migogoro. Alisema mkuu wa Mkoa. 

Aidha, mhe. Mkuu wa Mkoa alimpongeza mhe. mkuu wa Wilaya ya Kiteto kwa uongozi ulioimara kwani ameweza kudhibiti matukio ya mauaji ambayo hapo nyuma yalikuwa ni ya kila siku. Kuwa kwa sasa wote ni mashahidi kwa miaka minne mfululizo katika uongozi wa Mkuu wa Wilaya, hakuna tukio la mauaji lililosikika, hii ikiwa ni kwa sababu ya uongozi imara.

Mhe. Mkuu wa Mkoa amekemea vikali kitendo cha baadhi ya watu kumiliki maeneo makubwa ya Ardhi na pasipo kuyaendeleza wakati huo huo kuna wananchi wa kawaida ambao wanahitaji maeneo kwaajili ya kilimo na mifugo na pia wawekezaji wengine wanataka maeneo kwaajili ya uwekezaji. Ndg Mnyeti alimalizia kwa kumuomba Mhe. Waziri kuwa mashamba na maeneo kama haya ambayo yanakaa muda mrefu bila kuendelezwa na ni mapori, apewe muwekezaji mwingine na kama hapatikani, basi yarudishwe kwa wananchi.

Naye Kamishna msaidizi wa Ardhi mkoa wa Manyara, Ndg. Leonard Msafiri alisoma taarifa ya sekta ya Ardhi mkoa wa Manyara mbele ya Waziri wa Ardhi, Nyumba na Maendeleo ya Makazi Mhe. Lukuvi katika uzinduzi wa ofisi za Ardhi mkoa wa Manyara. Katika taarifa hiyo, Ndg Leonard alisema kuwa ofisi ya Ardhi mkoa wa Manyara ni mojawapo ya ofisi 26 za wizara ya Ardhi Tanzania Bara zilizoanzishwa kwa lengo la kusogeza huduma za wizara kwa wananchi, ambapo ofisi hii ilianza kazi mwanzoni mwa Mwezi Machi 2020 na hadi sasa ofisi ina watumishi 18 ambao wamehamishiwa kufanya kazi ofisi za Ardhi mkoa wa Manyara na tayari wameripoti wote na wanaendelea kutekeleza majukumu yao. Aliendelea kwa kutoa shukrani za dhati kutoka katika uongozi wa Mkoa wa Manyara kwa mhe. Waziri kwa kutoa pendekezo la kugatua madaraka katika usimamizi wa Ardhi katika ngazi za mikoa na mhe. Rais wa Jamhuri ya Muungano wa Tanzania Dkt. John Joseph Pombe Magufuli kuridhia na kufanya uamuzi wa kupeleka huduma za Ardhi zilizokuwa zinatolewa na Wizara katika ngazi za mikoa.

Imeandikwa na Nyeneu, P. R