Naibu Waziri Mifugo na Uvuvi amshukuru Mhe. Rais Mbele ya Baraza la Madiwani Mjini Babati

Imechapishwa: December 11th, 2020

Imeandikwa na Nyeneu, P. R - Mjini Babati

Naibu Waziri wa Wizara ya Mifugo na Uvuvi, Mbunge kutoka jimbo la Babati Mjini Mheshimiwa Pauline Philipo Gekul, tarehe 11 Novemba 2020 amemshukuru sana Rais wa Jamhuri ya Muungano wa Tanzania Mhe. John Joseph Pombe Magufuli kwa kumuamini na kumteua kumsaidia Waziri wa Wizara hiyo Mhe. Mashimba Ndaki.

Mheshimiwa Naibu Waziri ameyasema hayo katika ukumbi wa Mikutano wa Halmashauri ya Mji wa Babati katika Baraza la Kwanza la Madiwani wa Halmashauri hiyo lililofanyika jana tarehe 11 Novemba 2020.

“Ndugu zangu, nimshukuru sana Mhe. Rais, haikuwa kazi nyepesi kwani kati ya Wabunge zaidi ya Mia tatu nami kupatikana miongoni mwao, sio kazi nyepesi” alisema Mh. Gekul.

Sambamba na shukrani hizo, ameendelea kusema kuwa katika upande wa uvuvi Mkoa wa Manyara tayari wawekezaji kutoka china wamejitokeza katika Ziwa Manyara hivyo kazi inayoendelea ni pamoja na ufugaji wa samaki katika vizimba. Lakini amewataarifa wavuvi kukutana na hao wataalamu (wawekezaji) ili kujadili mambo mbalimbali yahusuyo uwekazaji huo.  

Uwekezaji huo katika Sekta ya uvuvi utapelekea upatikanaji wa ajira kwa wananchi na pia Halmashauri zitajinufaisha katika kujipatia mapato na pia kutapelekea upatikanaji wa Samaki wa kutosha katika mji wa Babati.

Hata hivyo, katika ajira zaidi ya milioni nane zilizoahidiwa na Mhe. Rais wa Jamhuri Ya muungano wa Tanzania, Naibu Waziri huyo amesema sekta ya Uvuvi imetakiwa itengeneze ajira zaidi ya elfu arobaini na tano nchi nzima ili kuimarisha, kukuza na kuboresha sekta hiyo.

Maneno hayo yamesemwa na Naibu waziri wa Mifugo na Uvuvi Paulina Gekul leo wakati akizungumza na Waandishi wa Habari baada ya kumalizika kwa baraza la Madiwani.

Naye Katibu Tawala Wilaya ya Babati Ndg Halfan Matipula amemuasa Mwenyekiti Mpya wa Baraza la Madiwani Mheshimiwa Diwani wa Kata ya Maisaka Bw. Abrahman H. Kololi kuwa mshikamano na ushirikiano na madiwani wenzake pamoja na katibu wake ambaye ni Mkurugenzi wa Halmashauri hiyo Ndg. Fortunatus Hilary Fwema ndiyo utakuwa chanzo kikubwa cha mafanikio katika Halmashauri.

“Ili tufanikiwe, Mhe Mwenyekiti ni muhimu sana kutambua kuwa hakuna mafanikio yoyote ambayo yanakuja bila mshikamano, ninayo Imani kubwa sana na wewe utashikamana na madiwani wako lakini pia utashikamana na katibu wako ambaye ni mkurugenzi wetu wa Halmashauri ya Mji”. Alisisitiza Katibu Tawala

Mheshimiwa Naibu Waziri wa Mifugo na Uvuvi(kushoto) Bi. Pauline Gekul akiwa na Katibu Tawala wa Wilaya ya Babati Ndg. Halfani Matipula.

Pamoja na hayo, Baraza la Madiwani limefanya Mkutano wake wa kwanza wa Baraza uliohudhuriwa na wananchi kutoka sehemu mbalimbali za mji wa Babati katika ukumbi wa mikutano wa Halmashauri ya mji. Katika Baraza hilo, zoezi la kuapishwa Madiwani lilifanyika likiambatana na uchaguzi wa viongozi (Mwenyekiti wa Halmashauri pamoja na makamu wake) ambapo Mhe. Kololi kuibuka kidedea na kuwa Mwenyekiti wa Halmashauri hiyo kwa kupata kura zote zilizopigwa na waheshimiwa madiwani.

Mheshimiwa Mwenyekiti wa Halmashauri ya Mji wa Babati Bw. Abrahman Hussein Kololi.

Naye Mhe. Hiiti Qambalali Mutho Diwani wa Kata ya Bonga alitangazwa kuwa Makamu mwenyekiti wa Halmashauri hiyo baada ya kuzoa kura zote zilizopigwa na waheshimiwa madiwani.

Mheshimiwa Mwenyekiti wa Halmashauri ya Mji wa Babati (Kulia) Bw. Abrahman Hussein Kololi akiwa Makamu wake (kushoto) Bw. Hiiti Qambalali Mutho.

(Picha zote na Nyeneu, P. R )