Mhe.Queen Sendiga amefanya kikao na madereva wa bodaboda,bajaji.machinga na mama lishe Mkoani Manyara.

Imechapishwa: September 20th, 2023

Mkuu wa Mkoa  wa  Manyara Mhe. Queen Sendiga  amefanya  kikao na madereva  wa  bodaboda, bajaji, machinga  na mama Lishe  katika Ukumbi  wa  Whiterose  Babati. Kikao hicho kimeudhuriwa na Katibu Tawala Mkoa  wa  Manyara  Mhe. Karolina Mthapula,  Mkuu wa Wilaya ya Babati Mhe Lazaro  Twange, Mkurugenzi  wa  Halmashauri  ya  Mji  wa  Babati  Pendo  Mangali  pamoja  na Wakuu wa Vyombo  vya  Ulinzi  na Usalama.

Mhe. Queen Sendiga  amefanya kikao hicho ili kuwafahamisha juu ya maandalizi ya sherehe za Kilele cha  Mbio za Mwenge wa Uhuru,Kumbukizi  ya  kifo  cha Baba wa Taifa Mwl.Julius  Kambarage  Nyerere pamoja  na maonesha  ya wiki ya vijana Kitaifa. Ambapo amewahimiza juu ya hutoaji wa huduma bora kwa  wageni  wanaotarajiwa  kuhudhuria katika matukio hayo ya Kitaifa.

Aidha  Mhe. Sendiga  amewasisitiza  kutumia fursa hiyo adimu kwa  kuboresha mazingira  ya hutoaji  huduma zao ikiwa ni madereva bodaboda kuwa wasafi, kuendesha vyombo vya moto kwa uangalifu na mama lishe kuzingatia usafi wakati wa kuandaa chakula.

 Pia katika kikao hicho ametoa kiakisi mwanga { reflactor} kwa  ajili ya madereva  wa bodaboda na bajaji kwa usalama wao pindi wanapokuwa barabarani,vilevile amewataka madereva wa bodaboda kuwa na ushirikiano wa kutosha  kwa kutoa taarifa pindi wanapoona dalili za watu wasio waadalifu wakati wa matukio hayo kwani kutakuwa na mwingiliano wa watu wengi.

Sambamba na hilo Mkuu wa Mkoa amewaruhusu madereva wa bodaboda,bajaji,machinga pamoja na mama lishe kuingia ndani ya uwanja wa Kwaraa ili kujionea  jinsi ya shughuli za Ujenzi wa Uwanja huo unavyoendelea  na kuwaomba kuutunza pindi utakapokamilika.Ameongeza kuwa uwanja huo ni mali ya wananchi wa Mkoa wa Manyara.