Halmashauri ya Mji Babati imeadhimisha Siku ya Mtoto Afrika katika Viwanja vya Shule ya Msingi Sendo.

Imechapishwa: June 16th, 2025

Halmashauri ya Mji Babati imeadhimisha Siku ya Mtoto Afrika katika Viwanja vya Shule ya Msingi Sendo Kata ya Mutuka yenye kauli mbiu isemayo;’’Haki za Watoto;Tulipotoka,Tulipo na Tuendako’’

Maadhimisho hayo yameudhuriwa na Wazazi,Walezi,Mashirika yasiyo ya Kiserikali,Wadau mbalimbali,Kaimu Mkurugenzi na Watumishi kutoka Idara ya Maendeleo ya Jamii,Watendaji wa Kata,Wenyeviti wa Vijiji ,Wanafunzi , Walimu na Mgeni rasmi katika Maadhimisho hayo ni Bi.Frida Mumbiri Afisa Elimu Msingi Taaluma wa Halmashauri ya Mji Babati kwa niaba ya Mkuu wa Wilaya ya Babati.

Bi.Frida Mumbiri amesisitiza malezi ya watoto kwa Wazazi ni muhimu sana hivyo kila mzazi atimize majukumu yake ili kuweza kuwa na kizazi kizuri hapo baadae.

Pia ameongeza kuwa Serikali imeendelea kuboresha mazingira mazuri katika kutoa Elimu Bora kwa watoto ili kuweza kufanya vizuri zaidi katika masomo.

Aidha amesisitiza suala la lishe kwa watoto mashuleni,Wazazi wametakiwa kupeleka chakula kwa wakati Shuleni ili Wanafunzi wawe na afya njema.

Bi.Frida ametoa wito kwa Jamii kuacha vitendo vya ukeketaji na ukatili wa Kijinsia kwa watoto Jamii imetakiwa kushirikiana na Wadau mbalimbali pamoja na Viongozi ili kutokomeza vitendo hivyo.

Vilevile amesemakuwa kauli mbiu inaakisi kabisa hali tuliyonayo kwa Sasa "Haki za Watoto,Tulipotoka,Tulipo na Tuendako hivyo Wazazi tuendelee kushirikiana kutokomeza ukatili wa kijinsia kwa watoto.

Mkuu wa Dawati la Kijinsia kwa watoto Afande Fatuma Silaa amesisitiza Wazazi kutokufumbia macho suala la Ukatili kwa Watoto kwa kumalizana nyumbani wametakiwa kuripoti katika Dawati la Kijinsia na mtuhumiwa kufikishwa katika vyombo vya Ulinzi na Usalama.

Sambamba na hilo Maadhimisho hayo yamepambwa na burudani kutoka kwa Wanafunzi yenye ujumbe mbalimbali katika ngonjera,mashairi na nyimbo.