Hali ya Mradi wa Vibanda vya Biashara uwanja wa Kwaraa

Imechapishwa: September 17th, 2020

Imeandikwa na Nyeneu, P. R

Kamati ya Menejimenti ya Halmashauri ya Mji wa Babati pamoja na kikosi kazi leo tarehe 17 septemba 2020 ikiongozwa na Kaimu Mkurugenzi wa Mji Bw. Luther Daniel wametembelea mradi wa vibanda vya biashara unaoendelea katika uwanja wa michezo wa Kwaraa, kufanya ukaguzi na kubaini vibanda vilivyoendelezwa kujengwa na ambavyo bado wadau wa vibanda hivyo wanasuasua kuviendeleza.

(Picha: Nyeneu, P. R) Mchumi Bw. Godlisten Geoffrey (Kulia) akitoa maelezo kwa wajumbe wa Menejimenti kuhusu mchakato mzima wa ujenzi wa vibanda vya Biashara uwanja wa Kwaraa.

Timu ya Menejimenti imefanya ukaguzi huo kufuatia tangazo la tarehe 15 Agosti 2020 la kuwataka wadau ambao hawajaendeleza ujenzi hadi kufikia tarehe 30 Agosti 2020 wanyang’anywe eneo na azimio hilo linaendelea kutekelezwa kwa wale wote ambao hawajaendeleza ujenzi katika maeneo hayo. 

Hadi kufikia tarehe 16 Septemba 2020, idadi ya maeneo ya ujenzi wa vibanda 136 tayari wamepatiwa wadau mbalimbali ili kuendeleza ujenzi, ambapo ujenzi huo umefikia katika hatua nzuri kwani vibanda 07 vipo hatua ya kenchi, vibanda 08 vipo katika hatua ya lenta ya juu, Vibanda 13 vipo hatua ya Jamvi (Hatua ya kwanza ya ujenzi umekamilika), Vibanda 79 vimejengwa msingi, kuwekwa Kifusi na kupangwa mawe. Aidha Vibanda 10 vimewekwa zege la awali (Blinding) na Maeneo 19 ya ujenzi wa vibanda havijaendelezwa ujenzi bali vimechimbwa msingi tu. Pia ni wadau 20 tu ndo waliojitokeza kujaza mikataba ya ujenzi kati ya wadau 136 waliopewa maeneo.

(Picha: Nyeneu, P. R). Baadhi ya vibanda ambavyo ujenzi umefikia katika hatua ya Kenchi kama inavyoonekana katika picha.

Aidha, hadi kufikia sasa mradi umekuwa na mafanikio mbalimbali kwa wanajamii kwani ujenzi bado unaendelea na wadau wameitikia kwa viwango na mradi umepokelewa kwa mtazamo chanya kwa wananchi wa Mji wa Babati. Pia mradi huu umewanufaisha wananchi wa eneo hilo kuanzia wauzaji wa material na vifaa mbalimbali vya ujenzi, madereva wa malori, na pia kutoa ajira kwa vijana nguvu kazi katika ujenzi. Kukamilika kwa mradi huu kutabadilisha muonekano wa Mji wa Babati na uwanja huo wa michezo kwa ujumla.

Ujenzi wa Vibanda katika hatua ya Lenta ya juu

Ujenzi wa Vibanda katika hatua ya jamvi

Pamoja na kuwepo na mafanikio mbalimbali katika kutekeleza mradi huu, kumekuwepo na changamoto kadhaa kama vile wadau kubadilishana vibanda wenyewe kwa wenyewe bila kumfahamisha Mkurugenzi wa Mji, Pia Changamoto nyingine ni wadau kutapeliana, wizi wa vifaa vya ujenzi(Material) pamoja na fedha. Pia ujenzi unaendelea kwa kusuasua – (kasi ya ujenzi kuwa ndogo) ambapo matarajio ya mradi ni kwamba hadi ifikapo tarehe 30 Desemba 2020 mradi unapaswa kukamilika.- Alieleza mchumi.

(Picha: Nyeneu, P. R) Moja kati ya maeneo ya vibanda ambayo hayajaendelezwa. Ujenzi wake umeishia katika hatua ya kuchimba msingi tu