DC Twange aagiza choo kijengwe maeneo ya Machinga Complex.

Imechapishwa: August 13th, 2020

Mhe. Mkuu wa Wilaya ya Babati Bw. Lazaro Jacob Twange leo tar 13 Agosti 2020 akiongozana na timu yake na maafisa mbalimbali kutoka halmashauri ya mji Babati, amefanya mkutano na wamachinga (wajasiriamali wadogo wadogo) katika eneo la Machinga complex Mjini Babati kuzungumzia kero mabalimbali zinazowakabili wafanyabiashara hao. Katika mkutano huo mdogo, Mhe. DC ametoa maagizo kwa Halmashauri ya Mji Babati kujenga choo cha kulipia katika eneo hilo ambalo wafanyabiashara wadogo wadogo wanafanya biashara zao na kujipatia riziki mbalimbali. 

Pichani ni baadhi ya Wajasiriamali wadogo wadogo (wamachinga) waliohudhuria mkutano mdogo na Mhe. Dc Twange.

Ameyasema hayo wakati kaimu Mkurugenzi wa Halmashauri hiyo Bw. Daniel Luther akijibu kero mbalimbali zinazo wakabili wamachinga hao katika shughuli zao za kila siku ikiwemo upatikanaji wa huduma ya choo, wafanyabiashara kutishiwa kuondolewa katika eneo hilo na mengine kadha wa kadha ambapo changamoto zote hizo zilipatiwa utatuzi (majibu) ya kuridhisha na kufikia muafaka wa yale yaliyozungumzwa. 

Aidha, katika mkutano huo, Mhe. DC ameagiza utekelezaji wa mambo yote waliyokubaliana yaanze muda si mrefu na yakamiliike ndani ya miezi miwili ambapo amesema hadi mwezi Oktoba mwanzoni mambo yote waliyokubaliana yawe yamekamilika. Pia pamoja na kuwepo kwa soko ambalo wamachinga wote wanafanya biashara zao, wafanyabiashara hao wameomba kuwe na siku maalumu kwaajili ya gulio. Ombi hilo limekubaliwa wakati Kaimu Mkurugenzi wa Mji wa Babati akijibu ombi la wafanyabiashara hao kutaka kuwepo na siku maalumu kwaajili ya Gulio.

Imeandikwa na Nyeneu, P. R