WAZIRI MHAGAMA ATEMBELEA KITUO CHA HALI YA HEWA BABATI

Imechapishwa: November 20th, 2017

 Waziri wa Sera, Bunge, Kazi, Vijana, Ajira na Walemavu Mh.Jenista Mhagama ametembelea Kituo cha Hali ya Hewa  kinachojiendesha chenyewe ( Automatic Weather Station) kilichopo katika Halmashauri ya Mji wa Babati na kuwataka wananchi wa Babati kukitumia kituo hicho vizuri ili kiweze kuwaletea maendeleo kwani kwa kufuatilia utabiri unaotolewa na kituo hicho wananchi wa Babati watapata uhakika wa kujua hali ya hewa katika Mji na itawasaidia sana wakulima,wafugaji, wakandarasi,watafiti na wanafunzi.

Akisoma risala kwa Mheshimiwa waziri  Meneja wa Kanda ya Nyanda za Juu Kaskazini Mashariki Bi.Juwairia K. Mshana  alisema kuwa kazi kubwa ya Mamlaka ya Hali ya Hewa ni kuhakikisha takwimu zinasaidia usalama wa wananchi na mali zao kwa kutoa tahadhari kwa matukio kama upepo mkali, Mvua kubwa na Mafuriko  ambayo yanaweza kuwakumba wananchi na mali zao kwa kutoa tahadhari.

Kituo hicho cha hali ya hewa kimejumuisha Kipima Mvua, (Automatic rain gauge), Kipima Upepo ( Wind van and anemometer) Na Kipima Mgandamizo wa hali ya Hewa (Barometer).

Akishukuru kwa niaba ya wananchi wa Babati  Mkurugenzi wa Halmashauri ya Mji Babati Bwana Fortunatus H. Fwema alimuhakikishia Mheshimiwa Waziri kuwa watashirikiana na  wataalamu wa Hali ya Hewa waliopo kituoni hapo ili kuhakikisha kituo hicho kinaleta manufaa kwa wananchi wa Babati na maeneo jirani pamoja na kukitunza kwani wanafahamu gharama za kujengwa kituo kicho.

Kituo hicho ni moja kati ya vituo 36 vilivyopo Tanzania nzima na kwa upande wa Nyanda za juu kaskazini  vipo vituo sita tu.