RC Joseph J Mkirikiti Asema na Wananchi wa Babati Mji.

Imechapishwa: August 24th, 2020

Imeandikwa na Nyeneu, P. R

Mkuu wa Mkoa wa Manyara Mhe. Joseph Joseph Mkirikiti amewataka wananchi wa Babati mji kuachana na fikira za kuwa Babati yetu ni ile ile haiendelei. Akaongeza na kusema Babati lazima iendelee. Ameyasema hayo alipokutana na wananchi wa Babati Mji katika viwanja vya Motel Papaa wakati akieleza moja kati ya maombi ya wananchi wa Babati mji kutaka stendi ya mabasi iliyoko maeneo ya katanini kata ya Maisaka kurudishwa Mjini.

"Kuna mambo mengi yanaweza kufanyika kuliko kufikiria miaka ya sitini, miaka ya sabini..kwamba Babati yetu ni ile ile haitaendelea. Babati lazima iendelee". Alisisitiza Mkuu wa Mkoa.

Aidha Mhe. Mkirikiti amempongeza Mkurugenzi wa Halmashauri ya Mji wa Babati Bw. Fortunatus Fwema kwa wazo la kuboresha uwanja wa Mpira wa Miguu almaarufu kama Uwanja wa Kwaraa uliopo katikati ya Mji wa Babati kwa kujenga vibanda vya biashara kuzunguka eneo hilo. Amewataka wananchi wajijengee desturi ya kutumia fursa nyingi zaidi ndani ya mji wao ili kujiletea maendeleo. Wakati akiongelea fursa ndani ya mji wa Babati, Mhe. RC ameongelea mashindano ya ngumi kitaifa yatakayofanyika ndani ya Mji wa Babati kuwa ni fursa kubwa sana kwa Wafanyabiashara kwa maana ya Maduka, Hoteli, n.k, Wasafirishaji kwa maana ya Bajaj, Magari, Boda boda, n.k, pia ni fursa kwa Mama Lishe. 

"Haiwezekani watu wote tukalime, wapo watakao kwenda kulima, watakao kwenda viwandani na pia wapo watakao kwenda michezoni". Aliongezea RC

Pia, Mhe. Mkuu wa Mkoa amewataka wananchi wote wa Babati Mji kulisaidia Jeshi la Polisi katika jitihada zao za kuhakikisha Babati bila madawa ya kulevya, Manyara bila madawa ya kulevya inawezekana. Mhe Mkirikiti amempongeza RPC Manyara Bw. Paulo Kasabago kwa kuanza oparesheni ya kupambana na madawa ya kulevya, na amemuagiza RPC kuwa oparesheni hiyo iwe ni ya kudumu. 

"Sasa wavuta bangi wa Babati wakatafute kazi nyingine, na wauza bangi wa Babati wakatafute kazi nyingine". Aliendelea kusisitiza Mkirikiti.

Jambo la mwisho mhe. mkuu wa Mkoa amewakumbusha wananchi wa Babati mji kwamba wajiandae na uchaguzi wa Madiwani, Wabunge na Rais, ili kuendelea kudumisha amani ya Babati na Mkoa kwa ujumla. Serikali itawajibika kuhakikisha kila mmoja (mwananchi) anashiriki uchaguzi katika hali ya utulivu ndani ya Majimbo, ndani ya Wilaya na pia ndani ya Mkoa.