Mhe. Mwenyekiti wa Halmashauri ya Mji wa Babati amesisitiza malezi bora kwa watoto.

Imechapishwa: June 16th, 2023

Mwenyekiti wa Halmashauri wa Mji wa Babati Mhe.  Abdulrahman  Kololi ambaye alikuwa mgeni rasmi  katika maadhimisho ya siku ya Mtoto wa Afrika, yaliyoadhimishwa katika kata ya Singe kijiji cha Managha amewataka wazazi na walezi  kuwa mstari wa mbele katika kutokomeza vitendo vya ukatili  kama vile ubakaji, ndoa za utotoni, ukeketaji, ulawiti kwa kufuata sheria na taratibu zilizopo kwani ni jukumu letu kuwalinda watoto.

Aidha, Mhe. Mwenyekiti  ameongeza kuwa wazazi kupitia Maigizo na Ngonjera walizoonesha wanafunzi hao leo iwe chachu kwetu kuwa makini na matumizi ya simu zetu kwa watoto kwani  yanachangia kwa kasi kubwa kuchochea  Mmomonyoko wa maadili.

Pia  Bw.  Augustino Balao mwakilishi kutoka shirika la COSITA amesisitiza kuwa tutenge muda kwa ajili ya watoto ili tuweze kugundua na kuvikuza vipaji walivyonavyo. Vilevile ameongeza kuwa vitu vinavyomfanya  mtoto kuwa imara ni lishe, Afya, Elimu, Malezi, Ulinzi na Usalama katika maisha yao ya kila siku.

Aidha Ofisi ya Mkurugenzi kupitia Idara ya Maendeleo ya Jamii , inaendelea kutoa elimu kuhusu ukatili wa kijinsia kupitia dawati la jinsia pamoja na kutembelea shule na kutoa elimu. Vilevile Mkuu wa Idara hiyo  Bi. Diana Mchonga  amewasisistiza wazazi kuwa  jukumu la malezi ni la watu wote.