Watumishi Manyara wametakiwa kupendana na kuacha chuki.

Imechapishwa: April 30th, 2025

Watumishi Manyara wametakiwa kupendana na kuacha chuki.

Mkuu wa Mkoa wa Manyara Mhe. Queen Cuthbert Sendiga amewataka wafanyakazi wa Mkoa wa Manyara kuishi kwa upendo na kushirikiana katika kazi.

Hayo ameyasema wakati wa maadhimisho ya kuelekea siku ya Wafanyakazi duniani ambayo kwa ngazi ya Mkoa yamefanyika katika Viwanja vya Tanzanite Kwaraa yenye kauli mbiu isemayo " Uchaguzi Mkuu 2025 utuletee Viongozi wanaojali haki na maslahi ya Wafanyakazi, sote tushiriki".

Mhe. Sendiga amewataka waajiri wa sekta binafsi na Taasisi za Serikali kutoa mikataba kwa waajiriwa pamoja na kuwapa stahiki zao zikiwemo kuwaruhusu kujiunga na vyama vya wafanyakazi pamoja na malipo ya malimbikizo ya pesa za likizo, uhamisho na mishahara kabla ya mwezi wa saba.

Aidha amewataka Watumishi kuwa waadilifu katika kazi na kutambua kuwa wao ni wawakilishi wa Serikali kwenye jamii  na kusisitiza kuwa ili wapate haki ni lazima watimize wajibu.

 Mhe. Sendiga ameeleza kuwa Serikali imefanya maboresho katika sekta ya Afya, Elimu na Miundombinu kwa ujumla kwa kuongeza Vifaa.

"Katika awamu ya Sita Serikali imeboresha mazingira ya Watumishi kwa kupandisha madaraja, nyongeza za mishahara, kutoa ajira kwa vijana, pamoja na kupandisha vyeo Watumishi 280,000",ameeleza

Sambamba na hilo amewaasa Watumishi kujiepusha na Siasa chonganishi bali wafuate utaratibu sahihi wa kushiriki kugombea nafasi mbalimbali katika Uchaguzi Mkuu utakaofanyika Oktoba 2025.