Vijiji 10 katika Wilaya ya Babati vya kunufaika na ufugaji wa kuku wa kisasa.

Imechapishwa: June 26th, 2025

Jumla ya Vijiji 10 vinavyounda Jumuiya ya wanyama pori Burunge (WMA) katika Wilaya ya Babati vinatarajiwa kunufaika na mradi wa ufugaji wa kuku aina ya Sasso ili kukidhi mahitaji ya soko la nyama za kuku katika hoteli za kitalii zilizipo kwenye maeneo yao pamoja na maeneo jirani.

Akizungumza katika kikao kazi Mkuu wa Wilaya Babati Mhe. Emmanuela Kaganda amesema lengo la mradi ni kuwainua wananchi kiuchumi kwa ngazi ya kaya,pia ametoa rai kwa wadau wa Sekta za utalii kuunga mkono jitihada za wananchi hao kwa kununua kuku watakaozalishwa.

Aidha katika kikao hicho wadau wa Maendeleo kutoka kampuni ya Silver land ambao ni wasambazaji wa vifaranga na vyakula vya kuku wameahidi kutoa ushirikiano wa kitaalam katika kuwawezesha wananchi kufuga kuku kwa njia ya kisasa pamoja na kuahidi kuwapa mafunzo na vifaranga 500 pamoja na chakula cha kuku kwa wananchi 60 ambao watapewa mafunzo ya kulea vifaranga wadogo(mother unit)kutoka katika vijiji hivyo kama mtaji wa kuanzia.

Pia Afisa masomo kutoka kampuni ya Silver land Bi. Mwanamvua S.Ngocho ameeleza kuwa kwa vifaranga 500 mfugaji ana weza tengeneza faida ya takribani milioni kwa wiki nne.

Kwa upande wao wadau wa utalii kutoka Chemchem Association wameahidi kutoa soko la uhakika kwa kuku watakaozalishwa na wananchi kutoka vijiji hivyo.