DC Twange apiga hodi Babati Mji. Asisitiza mambo matano

Imechapishwa: July 17th, 2020

Mheshimiwa Mkuu wa Wilaya ya Babati Bw. Lazaro Jacob Twange akiambatana na kamati ya ulinzi na usalama Wilaya, kwa mara ya kwanza ameitembelea Halmashauri ya Mji wa Babati jana Tarehe 16 Julai 2020. Katika ziara hiyo, Mhe. Mkuu wa Wilaya amewapongeza watumishi wote kwa nafasi zao kuifikisha Halmashauri katika hatua nzuri ya kimaendeleo.

Baada ya Mkurugenzi wa Mji, Ndg. Fortunatus H. Fwema kusoma taarifa ya Halmashauri kwa Mhe. Mkuu wa Wilaya, Mhe. Twange akaongelea kwa msisitizo mambo makuu matano ambayo ni: -

• Ukusanyaji wa Mapato kwa weledi wa hali ya juu zaidi,

• Vyanzo vya mapato katika halmashauri ya Mji,

• Matumizi mazuri ya fedha za umma,

• Uchaguzi mkuu na

• Maadili katika kazi.

Kiongozi huyo ambaye ameteuliwa na Mhe. Rais wa Jamhuri ya Muungano wa Tanzania Dkt. John Pombe Magufuli baada ya aliyekuwa Mkuu wa Wilaya ya Babati Bi. Elizabeth Kitundu kustaafu utumishi, amesema kiwango cha ukusanyaji mapato cha sasa hakiridhishi na pia kuwe na nidhamu katika matumizi ya fedha za umma kwani siku zote fedha huwa hazitoshi.

Watumishi wa Halmashauri ya Mji wa Babati (Wakuu wa Idara na vitengo mbalimbali, watumishi katika idara na vitengo,  watendaji wa kata) walivyoshiriki kikao kifupi na Mh. Dc katika ukumbi wa Mji.

Aidha, katika kikao hicho kilichofanyika katika ukumbi wa Mji, DC Twange akihojiana na Afisa Biashara Bw. Chediel Fue, amewaagiza na kuwahimiza waweke muda maalum (deadline) katika zoezi la ugawaji vitambulisho vya wajasiriamali na kusimamia kwa weledi zoezi hilo.

Naye OCD amewaasa watumishi wote watakao shiriki katika zoezi la Uchaguzi mkuu hapo Oktoba (hasa hasa watendaji wa kata), kuwa makini kusimamia vyema na kwa weledi zaidi zoezi hilo ili tupate viongozi bora na si bora kiongozi.

imeandikwa na Nyeneu, P. R (TICTO)